“Қари қўрқоқ”: Неймар 69 ёшли журналист билан тортишиб қолди
“Сантос” ҳужумчиси Неймар бразилиялик журналист Фабио Сормани билан ижтимоий тармоқларда баҳслашиб қолди. Можаро Бразилия чемпионатида “Сантос”нинг “Мирасол” билан 1:1 ҳисобидаги дурангидан кейин бошланган. Сормани Неймарнинг ўйинини танқид қилиб, жароҳатлардан кейин ҳужумчи аввалгидек рақибларини қисқа масофада алдаб ўта олмаётганини айтган.
69 ёшли журналист ҳатто Неймарни яккама-якка баҳсга чорлаб, кичик майдонда беш уринишнинг барчасида ундан тўпни олиб қўя олишини таъкидлаган. Неймар эса чақириқни қабул қилиб, Сорманини “Сантос” машғулот базасига таклиф қилган.
Кейинчалик Сормани баҳсни йил охирига қолдиришни таклиф қилган. У ҳозир Неймарни тасодифан жароҳатлаб қўйишни ва мавсум давомида “Сантос”га зарар етказишни истамаслигини сабаб сифатида кўрсатган. Неймар эса бунга жавобан журналистни “Қари қўрқоқ” деб атаб, унинг баҳона қилаётганини ёзган.
Маълумот учун, Неймар 2025-йил январь ойида “Сантос” сафига қайтган. 2026-йил январда эса бразилиялик футболчи клуб билан шартномасини узайтирган. Амалдаги келишув 2026-йил охиригача мўлжалланган.
