Аргентина Месси билан хайрлашмоқда
Аргентина Месси билан хайрлашмоқда
Афсона миллий жамоа либосидаги сўнгги ўйинида ҳам иккита ассист ва гол урди. Бутун стадион ва футболчилар Лео билан кўз ёшлари ила хайрлашмоқда. Футболда катта давр якунига етмоқда.
«Интер Майами» ҳужумчиси Лионель Месси Аргентина миллий жамоасидаги фаолиятини расман якунлади. 39 ёшли футболчининг миллий жамоадаги сўнгги баҳси Бенинга қарши ўртоқлик беллашувига тўғри келди.
Буэнос-Айресдаги «Монументал» стадионида ўтган баҳсда Аргентина 3:0 ҳисобида ғалаба қозонди. Месси 71-дақиқада пенальтини аниқ амалга ошириб, жамоасининг учинчи голини урди. Шунингдек, у Николас Отаменди ва ярим ҳимоячи Нико Паснинг голларига голли узатма берди.
Месси Аргентина миллий жамоаси сафидаги дебютини 2005 йил август ойида Венгрияга қарши баҳсда ўтказган. У миллий жамоа сафида жами 208 та баҳсда майдонга тушиб, 126 та гол ва 70 та голли узатмага муаллифлик қилди.
Фаолияти давомида Месси Аргентина билан 2022 йилги жаҳон чемпионати, 2021 ва 2024 йиллардаги Америка Кубоги ҳамда 2022 йилги Финалиссимада ғолиб чиқди.
Маълумот учун, Месси миллий жамоалар сафида гол уриш бўйича Криштиану Роналдудан кейин иккинчи ўринда туради. Португалиялик ҳужумчи миллий жамоа сафида 146 та гол урган.
Эслатиб ўтамиз, Месси 2026 йилги жаҳон чемпионатидан кейин Аргентина миллий жамоасидаги фаолиятини якунлашини маълум қилган эди.
