Аргентина футболчилари Скалонидан терма жамоада қолишни сўрамоқда
Аргентина терма жамоаси футболчилари бош мураббий Лионель Скалонининг миллий жамоадаги фаолиятини давом эттиришини истамоқда. 48 ёшли мутахассиснинг амалдаги шартномаси 2026 йил декабрида якунланади ва ҳозирча янги келишув бўйича якуний қарор қабул қилинмаган. Бу ҳақда TyC Sports нашри хабар бермоқда.
Манбага кўра, Николас Пас, Кристиан Ромеро, Леонардо Балерди ва Жанлука Престианни каби футболчилар Скалонининг қолишини очиқ қўллаб-қувватлаган. Ромеро мураббийни терма жамоани шакллантирган асосий инсонлардан бири деб атаган бўлса, Пас айнан Скалони унга Аргентина сафида дебют қилиш имконини берганини таъкидлаган.
Скалонининг келажаги 2026 йилги Жаҳон чемпионати финалидан кейин сўроқ остида қолган. Аргентина ҳал қилувчи учрашувда Испанияга 0:1 ҳисобида ютқазгач, мутахассис лавозимини тарк этиши мумкинлигига ишора қилган эди. Ҳозирда у Аргентина футбол ассоциацияси билан янги шартнома бўйича музокараларни давом эттирмоқда.
Маълумот учун, Скалони 2018 йилдан буён Аргентина терма жамоасини бошқариб келмоқда. Унинг қўл остида жамоа 2021 ва 2024 йилларда Америка Кубогини, 2022 йилда эса Жаҳон чемпионатини қўлга киритди. Шу сабабли футболчилар уни Месси давридан кейинги янги босқичда ҳам жамоа бошида қолишини истамоқда.
