Argentina futbolchilari Skalonidan terma jamoada qolishni so‘ramoqda
Argentina terma jamoasi futbolchilari bosh murabbiy Lionel Skalonining milliy jamoadagi faoliyatini davom ettirishini istamoqda. 48 yoshli mutaxassisning amaldagi shartnomasi 2026-yil dekabrida yakunlanadi va hozircha yangi kelishuv bo‘yicha yakuniy qaror qabul qilinmagan. Bu haqda TyC Sports nashri xabar bermoqda.
Manbaga ko‘ra, Nikolas Pas, Kristian Romero, Leonardo Balerdi va Janluka Prestianni kabi futbolchilar Skalonining qolishini ochiq qo‘llab-quvvatlagan. Romero murabbiyni terma jamoani shakllantirgan asosiy insonlardan biri deb atagan bo‘lsa, Pas aynan Skaloni unga Argentina safida debyut qilish imkonini berganini ta’kidlagan.
Skalonining kelajagi 2026-yilgi Jahon chempionati finalidan keyin savol ostida qolgan. Argentina hal qiluvchi uchrashuvda Ispaniyaga 0:1 hisobida yutqazgach, mutaxassis lavozimini tark etishi mumkinligiga ishora qilgan edi. Hozirda u Argentina futbol assotsiatsiyasi bilan yangi shartnoma bo‘yicha muzokaralarni davom ettirmoqda.
Ma’lumot uchun, Skaloni 2018-yildan buyon Argentina terma jamoasini boshqarib kelmoqda. Uning qo‘l ostida jamoa 2021 va 2024-yillarda Amerika Kubogini, 2022-yilda esa Jahon chempionatini qo‘lga kiritdi. Shu sababli futbolchilar uning Messi davridan keyingi yangi bosqichda ham jamoa boshida qolishini istamoqda.
