Арда Гюлер «Бавария»га қарши ўйин якунлангач қизил карточка билан жазоланди
«Реал» яримҳимоячиси Арда Гюлер Чемпионлар Лигаси чорак финали доирасидаги «Бавария»га қарши жавоб учрашуви (3:4) якунлангач, ҳакам томонидан қизил карточка билан жазоланди.
Футболчи учрашув бош ҳаками Славко Виншичнинг Эдуарду Камавингани майдондан четлатиш борасидаги қарорига ғазабга келган. Айни шу четлатишдан сўнг «қаймоқранглилар» ўз дарвозаларидан икки бор тўп олиб чиқиб, мусобақани тарк этишган эди.
Таъкидлаш жоизки, Гюлер ўйиннинг биринчи бўлимида ўз ҳисобига дубль ёздириб қўйишга улгурган эди. Яримҳимоячи учрашувнинг 90-дақиқасида захирага олинган.
Эндиликда «Бавария» Чемпионлар Лигасининг яримфиналида «ПСЖ» билан тўқнаш келади.
Маълумот учун, 1/8 финал босқичида «Реал» икки ўйин натижасига кўра «Манчестер Сити»ни 5:1 ҳисобига мағлуб этган эди. Мюнхенликлар эса худди шу босқичда «Аталанта»ни умумий 10:2 ҳисобига тормор келтиришган.
