Қаҳрамон Асланов: «Биринчи хаёлга Рафинья келади»
Журналист Қаҳрамон Асланов “олтин тўп”ни ким олиши мумкинлиги ҳақида фикр билдирди:
"Ҳалиҳам “Барселона” футболчиларидан бири “Олтин тўп” олиши эҳтимоли йўқ эмас, деб ўйлайман. Агар шундай бўлса, табиийки, биринчи навбатда хаёлга Рафинья келади, унинг статистикаси, голлари, Чемпионлар Лигасидаги рекордга яқинлашиши эътирофга арзийди ҳам, тўғри.
Лекин нега 2010 йилда “Олтин тўп”ни финалда гол уриб жаҳон чемпиони бўлган Иньеста эмас, Месси олганини ҳам тушунаман. Иккови бир жамоада ўйнаган – фарқни кўриш шунинг учун ҳам жуда осон. Иньеста майдонда ҳар қандай ишни бажара оларди, аммо бу Мессининг ишларининг ярми бўларди. Буни ҳамма, Иньестанинг ўзи ҳам тан олади, олган ҳам.
Шу томондан қарасак, айниқса охирги икки ой Ламин Ямални бутунлай бошқа даражага олиб чиқди. “Барселона”нинг ҳамма катта ўйинларини қараб чиқинг, бошқатдан кўринг, фарқни сезасиз: Рафинья зўр, ҳа, аммо Ямал ундан ташқари яна шунча кўпроқ. Рафинья тизим учун жуда муҳим мўрват, панд бермайди, яхши ишлайди, аммо ҳар оғир аҳволда, тизим тўлиқ ишлай олмаётган пайтда биз тўпни Ямалнинг оёғида кўрдик. У тўпни ўзи олмади, шериклари узатишди, жумладан Рафинья ҳам",-дейди Асланов