АПЛнинг уч клуби “Милан” футболчиси Фофана учун курашмоқда
“Милан” ярим ҳимоячиси Юссуф Фофана фаолиятини Англия Премьер Лигасида давом эттириши мумкин. Франциялик футболчига “Ноттингем Форест”, “Кристал Пэлас” ва “Астон Вилла” қизиқиш билдирмоқда. Айни пайтда учала клуб ҳам трансфер бўйича “Милан” билан музокара олиб бормоқда.
Маълумотларга кўра, Италия клуби 27 ёшли ярим ҳимоячини шу ёзда сотишга тайёр. “Милан” Фофананинг трансфери учун 13 миллион евро атрофида маблағ талаб қилмоқда.
Фофана 2024-йилда “Монако”дан “Милан”га кўчиб ўтган. Франциялик футболчининг миланликлар билан амалдаги шартномаси 2028-йилнинг ёзига қадар мўлжалланган. Ҳозирча футболчининг кейинги клуби борасида якуний келишувга эришилгани ҳақида маълумот йўқ.
Маълумот учун, Фофана ўтган мавсум барча мусобақаларда 36 та учрашувда майдонга тушиб, 2 та гол ва 4 та голли узатма қайд этди. Эндиликда унинг фаолиятини АПЛда давом эттириш эҳтимоли мавжуд.
