АПЛнинг уч гранди Рафиньяга қизиқиш билдирмоқда
«Барселона» ҳужумчиси Рафинья фаолиятини Англия Премьер-лигасида давом эттириши мумкин. Бразилиялик футболчига «Арсенал», «Ливерпуль» ва «Манчестер Юнайтед» қизиқиш билдирмоқда. Шунингдек, Саудия Арабистонининг «Ал-Ҳилол» клуби ҳам вазиятни кузатиб бормоқда. Бу ҳақда инсайдер Экрем Конур хабар бермоқда.
Манбага кўра, Рафинья «Барселона» билан янги шартнома бўйича музокаралар олиб бормоқда ва маошини сезиларли даражада оширишни истамоқда. Агар томонлар молиявий шартлар бўйича келиша олмаса, футболчига қизиқишаётган клублар юқорироқ маош таклиф қилишга тайёр.
Шу билан бирга, Рафиньянинг ўзи Каталония клубини тарк этиш ниятида эмаслигини билдирди. Бразилиялик футболчи RAC1’га берган интервьюсида шартномасини узайтиришни ва имкони бўлса, фаолиятини «Барселона»да якунлашни исташини айтди. Шу сабаб ҳозирча АПЛ клубларининг қизиқиши трансфер бўйича аниқ музокарага айлангани тасдиқланмаган.
Маълумот учун, 29 ёшли Рафиньянинг «Барселона» билан амалдаги шартномаси 2028 йил ёзигача мўлжалланган. Жорий мавсумда у барча мусобақаларда 7 та учрашувда 11 та гол уриб, 3 та голли узатмани амалга оширди.
