АПЛни тарк этган илк жамоа маълум бўлди
АПЛ якунига 5 та тур қолганида биринчи омадсиз жамоа маълум.
ФОТО: Getty images
Англия чемпионатининг 33-тури якунларига кўра, «Вулверхэмптон» АПЛда жон сақлаб қолиш имкониятини бутунлай йўқотди. «Кристал Пэлас» ва «Вест Хэм» ўртасидаги учрашувда қайд этилган дуранг (0:0) «бўрилар» учун якуний ҳукм бўлди.
Мавсум тугашига беш тур қолган бир вақтда «Вулверхэмптон» ҳисобида 17 очко мавжуд. Жамоани хавфсиз бўлган 17-ўриндан 16 очко ажратиб турибди.
«Вулверхэмптон» охирги саккиз йил давомида АПЛда мунтазам иштирок этиб келаётган эди. Катта эҳтимол билан, «Бёрнли» ва Лондон клубларидан бири — «Вест Хэм» ёки «Тоттенхэм» ҳам уларга шерик бўлади.
«Ковентри Сити» эса Чемпионшипдан АПЛга йўл олган биринчи жамоага айланганди.
Розикжон Султонмуродов
Журналист