АПЛга чиққан «Ковентри» ўз таркибини «Ювентус» ҳужумчиси билан кучайтирмоқчи
2025/2026 йилги мавсум якунларига кўра Чемпионшипдан Англия Премьер-лигасига йўлланмани қўлга киритган «Ковентри» клуби элитадаги иштироки олдидан таркибни жиддий кучайтириш ҳаракатига тушган. «Челси»нинг собиқ футболчиси ва мураббийи Френк Лемпард бошқарувидаги жамоа ўз эътиборини «Ювентус»да ижара асосида тўп тепаётган Бельгия терма жамоаси ҳужумчиси Лои Опендага қаратди.
La Gazzetta dello Sport нашрининг хабар беришича, «Ковентри» вакиллари футболчининг Туриндаги ҳозирги ҳолати ва режалари билан танишиш мақсадида у билан алоқага чиққан. Маълум қилинишича, инглиз клубида ҳужумчини кейинчалик сотиб олиш ҳуқуқи ёки мажбурияти билан ижарага олиш имконияти мавжуд.
Шахсан Френк Лемпард Опенданинг ўйин услубини юқори баҳоламоқда ва унинг трансферига қизиқиш билдираётганини маълум қилган.
26 ёшли бельгиялик форвард Италия клубига ўтганидан бир йил ўтиб, Туринни тарк этиши мумкин. Опенда «Ювентус» сафида барча турнирлар доирасида 34 та учрашувда майдонга тушиб, бор-йўғи 2 та гол уришга эришди.
Эслатиб ўтамиз, ўтган ёзда Турин клуби ҳужумчини «RB Лейпциг»дан 42,75 миллион евро эвазига сотиб олиш мажбурияти билан ижарага олган эди.
