АПЛда оғзини қўли билан ёпган футболчилар қизил карточка олмайди
2026 йилги Жаҳон чемпионатида кўплаб баҳс-мунозараларга сабаб бўлган қоидалардан бири Англия Премьер-Лигасида қўлланилмайди. Унга кўра, футболчи рақиби билан можаро вақтида гаплашаётганида оғзини қўли билан ёпса, айрим мусобақаларда бу ҳолат қизил карточкага сабаб бўлиши мумкин. АПЛ эса 2026/27 йилги мавсумда бу имкониятдан фойдаланмасликка қарор қилган.
Жаҳон чемпионатида парагвайлик Мигел Алмирон ва эквадорлик Пьеро Инкапие айнан шундай ҳолатлар сабаб майдондан четлатилганди. Англия футболчиси Жуд Беллингем эса Ганага қарши учрашувда оғзини қўли билан ёпган бўлса-да, жазоланмаган. Ҳақам вазиятни рақиб билан можаро сифатида баҳоламаган.
Бу масала ўтган мавсумдаги Чемпионлар лигасининг “Бенфика” — “Реал Мадрид” учрашувидан кейин жиддий муҳокама қилина бошлаган. Лиссабон клуби футболчиси Жанлука Престианни Винисиус билан тортишув вақтида оғзини қўли билан ёпган, кейинчалик эса дискриминацион хатти-ҳаракатда айбланиб, дисквалификация қилинган эди.
Маълумот учун, УЕФА ҳам ўз турнирларида футболчининг оғзини қўли билан ёпишини автоматик қизил карточка учун асос деб ҳисобламайди. Яъни бундай вазиятларда ҳакамлар эпизоднинг мазмуни ва контекстига қараб қарор чиқаради.
