Анвар Ғофуров: «Кимга қарши ўйнаётганимизни яхши билардик»
Суперлига 19-туридан ўрин олган «Сурхон» - ОКМК учрашувидан сўнг термизликлар бош мураббийи Анвар Ғофуров матбуот анжуманида иштирок этди.
- Бугунги учрашув ҳақида фикрларингиз?
- Бугун яхши жамоага қарши майдонга тушдик. Рақибнинг ҳужумкор жамоа эканини ва кимга қарши ўйнаётганимизни яхши билардик. Биз учун ҳар бир ўйинда очко жуда муҳим эканини футболчиларга тушунтирган эдик.
Ўйлайманки, кўп ўйинларда натижа борасида мағлуб бўлаяпган бўлсак-да, ўйин сифати ва майдондаги ҳаракатларимиз борасида рақиблардан ортда қолаётганимиз йўқ. Албатта, бу яхши кўрсаткич, лекин жамоага натижа ҳам керак. Ишонаманки, биз бу натижага албатта эришамиз.
Бугунги ўйин осон кечмади. Йигитларга катта раҳмат айтмоқчиман. Улар майдонда бор куч ва имкониятларини ишга солиб, меҳнат қилишди.
Шунингдек, Термиздан узоқ масофани босиб ўтиб, бизни ўз стадионимизда ёлғизлатиб қўймаган мухлисларимизга алоҳида миннатдорчилик билдираман. Уларнинг қўллаб-қувватлаши футболчиларимизга катта далда бўлди.
Бу ўйинда қизил карточка ҳам ўз сўзини айтди. Шундан сўнг футболчилар хато қилмасликка, бир-бирини қўллаб-қувватлашга ва жамоавий ҳаракат қилишга ҳаракат қилишди. Бу, албатта, ижобий ҳолат.
- Қизил карточкадан сўнг ёш жамоангизни қандай руҳлантира олдингиз?
- Мен ҳар бир футболчимга ишонаман. Бу ишонч майдонда бўладими ёки майдондан ташқарида бўладими — фарқи йўқ. Якуний кенгайтирилган таркибга кирмаган футболчи ҳам, майдонга тушган ҳар бир футболчи ҳам ўз вазифасини бажариши ва бор кучини беришга тайёр бўлиши керак.
Бизда, албатта, ўзимизга яраша камчиликлар бор. Лекин энг муҳими — ҳар бир футболчи ўз вазифасини тўғри бажариши ва жамоа учун борини бериши керак. Мен футболчиларимга ишонаман.
- Бугун устозингизга қарши майдонга тушдингиз. Кейинги турда эса «Бунёдкор» жамоасига қарши ўйнайсиз. Қандай ўйин кутяпсиз?
- Бизни олдинда кубок ўйини ҳам кутяпти. Албатта, футболда ҳеч нарсани олдиндан айтиб бўлмайди. Агар кимдир натижани олдиндан аниқ била олганида, эҳтимол, у жаҳон чемпиони бўлар эди.
Ҳар сафар чемпионлар ва кучли жамоалар ўзгариб турса, демак, биз ҳам доимо ишлашимиз ва ҳар бир ўйинга жиддий тайёргарлик кўришимиз керак.
«Бунёдкор»га қарши ҳам қизиқарли ва мазмунли ўйин бўлади, деб ўйлайман. Биз ҳар бир учрашувга алоҳида тайёргарлик кўрамиз ва майдонга максимал натижа учун чиқамиз.
