Ансу Фатининг акаси жинсий зўравонликда айбланмоқда
Барселонада «Монако» ҳужумчиси Ансу Фатининг акасига нисбатан тергов ишлари бошланди. Abc нашри хабар беришича, нидерландиялик аёл «Барселона» яримҳимоячиси Ламин Ямалнинг уйида жинсий зўравонликка учраганини маълум қилган.
Манба берган маълумотларга кўра, воқеа 7 февраль куни содир бўлган. Аёл тунги клубда Ансу Фатининг акаси Фатино билан танишган ва базмдан сўнг компания билан бирга уйлардан бирига йўл олган. Эртага куни тонгда аёл кийимсиз ҳолда уйғонган ва ўзига нисбатан «номунсиб тегинишлар» бўлганини пайқаган. У гиёҳванд моддалар таъсирида зўравонлик қурбони бўлган бўлиши мумкинлигидан хавотирланиб, шифохонада махсус таҳлиллар топширган.
Дастлабки суриштирувларда аёл номунсиб ҳаракатлардан сўнг Фатининг юзига тарсаки туширганини билдирган. Ҳозирча полицияга расмий ариза берилмаган, чунки жабрланувчи тиббий таҳлил натижаларини кутмоқда. Айни дамда барча тергов ҳаракатлари фақат унинг кўрсатмаларига асосланган.
Аёл воқеа Ламин Ямалнинг уйида юз берганини таъкидлаган бўлса-да, «Барселона» клуби бу маълумотни расман рад этди. Полиция манбалари ҳам ҳодиса бутунлай бошқа жойда содир бўлганини тасдиқлашди.
Фатининг яқинлари эса ушбу айбловларни мутлақо асоссиз деб аташмоқда ва аёлнинг сўзларини катеrик тарзда инкор этишмоқда.
