Ҳанси Флик «Барселона» футболчиларига интизомни кучайтириш мақсадида жарималар тизимини жорий қилди
«Барселона» бош мураббийи Ҳанс-Дитер Флик жамоада интизомни кучайтириш мақсадида ўйинчилар учун йирик миқдордаги жарималар тизимини жорий қилди. Бу ҳақда каталонияликлар ҳужумчиси Ферран Торрес ўз интервьюсида маълум қилди.
Янги қоидаларга кўра, футболчилар машғулотларга ёки жамоавий йиғилишларга кечиккани учун жиддий молиявий санкцияларга дуч келишади. Хусусан, агар ўйинчи учрашув бўладиган куни белгиланган вақтдан кеч қолса, унга 40 минг евро миқдорида жарима солинади.
Торреснинг сўзларига кўра, Флик ўзининг қатъий интизоми билан танилган ва Каталония футболидаги анъанавий эркин муҳитга қарамай, немис мутахассиси ўзининг қатъий ёндашувидан воз кечмаяпти.
Маълумот учун, Ҳанс-Дитер Флик 2024 йилнинг ёзида «Барселона» бошқарувига келган эди. Шу пайтгача у жамоа билан 99 та ўйинда иштирок этиб, 74 та ғалаба, 9 та дуранг ва 16 та мағлубият қайд этди. Ўтган мавсумда у каталонияликларни Ла Лига чемпионлигига етаклаб келган эди.
