Ҳанси Флик «Барселона» бош мураббийи сифатида 100-ўйинини ўтказди
Испания Ла Лигасининг 26-туридан ўрин олган «Барселона» ва «Вильярреал» жамоалари ўртасидаги учрашув каталонияликларнинг 4:1 ҳисобидаги йирик ғалабаси билан якунланди.
Мазкур баҳс «кўк-анорранглилар» бош мураббийи Ҳанс-Дитер Флик учун клуб бошқарувидаги 100-юбилей ўйин сифатида тарихга кирди.
Германиялик мутахассис 2024 йилнинг май ойида «Барселона» бошқарувини ўз қўлига олган эди. Ўтган давр мобайнида Флик қўл остида жамоа сезиларли муваффақиятларга эришди.
Хусусан, каталонияликлар 2024/2025 йилги мавсумда Испания чемпионлигини қўлга киритишди, Испания Кубогида зафар қучишди ҳамда икки бор мамлакат Суперкубоги соҳибига айланишди. Ҳозирда мураббийнинг клуб билан амалдаги шартномаси 2027 йилнинг ёзига қадар мўлжалланган.
Ушбу ғалабадан сўнг «Барселона» 26 та ўйиндан 64 очко жамғарган ҳолда турнир жадвалида якка пешқадамлик қилмоқда. Маглубиятга учраган «Вильярреал» эса 51 очко билан кучли учликни якунлаб турибди.
