Ангола президенти Аргентинага қарши ўйиндан сўнг Мессига махсус кубок топширди

Ангола президенти Хуан Лоренсу Аргентина терма жамоаси ҳужумчиси ва сардори Лионель Мессига мамлакат мустақиллигининг 50 йиллигига бағишланган махсус мукофотни топширди.

Футболчи совринни жамоалар ўртасидаги ўртоқлик учрашувидан сўнг қабул қилиб олди. Унда «албиселесте» 2:0 ҳисобида ғалаба қозонди.

Учрашувнинг 43-дақиқасида Лаутаро Мартинес 38 ёшли Лионель Мессининг узатмасидан кейин ҳисобни очди. 82-дақиқага келиб эса Мессининг ўзи гол урди, бу сафар Лаутаро унга голли пас берди.

Умуман олганда, 38 ёшли Лионель Месси Аргентина терма жамоаси сафида 196 та ўйинда майдонга тушган. Бу баҳсларда у 115 та гол ва 64 та голли узатма муаллифига айланган.

Насрулло Каримов

Журналист