Англияда 19 ёшли мухлис Маунтни ҳақорат қилганликда гумонланиб, ҳибсга олинди
Ҳодиса АПЛнинг 11-туридан ўрин олган «Тоттенхэм»га қарши ўйинда содир бўлган.
ФОТО: Getty Images
Лондон полицияси «Манчестер Юнайтед» яримҳимоячиси Мейсон Маунтни ҳақорат қилганликда гумонланган 19 ёшли мухлисни қўлга олди. Бу ҳақда The Athletic хабар бермоқда.
Ҳодиса Англия Премьер-лигасининг 11-туридан ўрин олган «Тоттенхэм» – «Манчестер Юнайтед» (2:2) учрашувида, 8 ноябр куни юз берган.
Манбага кўра, стадион ходимларидан бири мухлиснинг Маунтга нисбатан ҳақоратли сўзлар айтаётганини эшитганидан сўнг уни стадиондан чиқариб юборган. Кейин ушбу ходим воқеа ҳақида полицияга маълум қилган.
Қайд этилишича, мухлис «атайин безовталик, қўрқув ёки ноқулайлик туғдириш» моддасига мувофиқ ҳибсга олинган ва тергов якунига қадар гаров эвазига қўйиб юборилган.
Мейсон Маунтнинг ўзи эса мухлиснинг ҳақоратини эшитмаганини билдирган.
Насрулло Каримов
Журналист
