Англия учинчи, Германия бешинчи: Евро-2028нинг асосий фаворитлари номи маълум бўлди
2028 йилда бўлиб ўтадиган футбол бўйича Европа чемпионатида ғолиблик учун асосий даъвогарлар рейтинги эълон қилинди. Рўйхатнинг биринчи поғонасини Испания терма жамоаси эгаллади. Бу ҳақда Goal нашри хабар бермоқда.
Манбага кўра, амалдаги Европа чемпиони Испания мусобақанинг энг асосий фаворити сифатида эътироф этилган. Иккинчи ўринга Франция, учинчи поғонага эса Англия терма жамоаси жойлаштирилган. Кучли бешликдан Португалия ва Германия ҳам ўрин олган.
Рейтингнинг кейинги поғоналарини Нидерландия, Швейцария, Норвегия, Бельгия ва Италия терма жамоалари эгаллаган. Шунингдек, Дания 11-ўринда, Хорватия 13-ўринда, Туркия 16-ўринда, Украина эса 20-поғонада қайд этилган. Мазкур рейтинг турнир бошланишига ҳали анча вақт борлиги сабаб дастлабки тахмин сифатида тақдим этилган.
Маълумот учун, Испания терма жамоаси Европа чемпионатида тўрт марта — 1964, 2008, 2012 ва 2024 йилларда ғолиб чиққан. Испанлар 2008 ва 2012 йиллардаги Европа чемпионатлари оралиғида 2010 йилги Жаҳон чемпионатида ҳам зафар қучган.
