Англия терма жамоасининг машғулот анжомлари ўғирлаб кетилди
Англия терма жамоаси Жаҳон чемпионати стартидан олдин жиддий ва кутилмаган муаммога дуч келди. The Sun нашри хабар беришича, инглиз футболчиларининг бутсалари, машғулот учун керакли жиҳозлари ва бошқа муҳим анжомлари Флорида штатидан Канзас-Ситига олиб кетилаётган пайтда ўғирланган.
Манбага кўра, йўқолган буюмлар орасида футбол тўплари, машғулот ускуналари, таҳлилий техника, Томас Тухел фойдаланадиган тактик доскалар ҳамда массаж столлари ҳам бўлган.
Англия терма жамоаси мундиал олдидан Флоридада тайёргарлик йиғини ўтказган эди. У ерда жамоа Янги Зеландия, Коста-Рика ва маҳаллий «Майами Юнайтед» клубига қарши назорат учрашувларида майдонга тушиб, барчасида ғалаба қозонган.
Жамоа шанба куни эрталаб Канзас-Ситидаги меҳмонхонага етиб келган ва шу куннинг иккинчи ярмида машғулотларни бошлаши керак эди. Шу сабабли асосий спорт анжомлари олдиндан алоҳида транспорт орқали юборилган. Аммо йўлда юклар ўғирлангани сабабли Англия терма жамоаси машғулот жараёнини тўлиқ режа асосида бошлашда муаммога дуч келган.
Маълумот учун, Англия терма жамоаси Жаҳон чемпионатидаги илк учрашувини 17-июн куни Хорватияга қарши ўтказади.