Англия терма жамоаси жиҳозлари ўғирланиши бўйича иккита гумондор қўлга олинди
Канзас-Сити полицияси Англия терма жамоасига тегишли спорт жиҳозлари ўғирлангани бўйича суриштирув бошланганини тасдиқлади. Бу ҳақда Sky News хабар бермоқда.
Манбага кўра, жамоа Канзас-Ситига етиб келганида транспорт воситасидаги айрим буюмлар йўқолгани аниқланган. Полиция ҳолат юзасидан тергов олиб бормоқда ва иш бўйича шубҳа уйғотган икки шахс вақтинча ҳибска олинган.
Қайд этилишича, йўқолган буюмлар орасида Англия етакчилари Харри Кейн ва Жуд Беллингемнинг бутсалари ҳам бор. Шунингдек, терма жамоа машғулотларда фойдаланадиган деярли барча тўпларидан айрилгани, уларнинг ихтиёрида фақат битта тўп қолгани хабар қилинмоқда.
Маълумот учун, Англия терма жамоаси Жаҳон чемпионатидаги илк учрашувини 17-июндан 18-июнга ўтар кечаси Хорватияга қарши ўтказади.
