Angliya terma jamoasi jihozlari o‘g‘irlanishi boʻyicha ikkita gumondor qoʻlga olindi
Kanzas-Siti politsiyasi Angliya terma jamoasiga tegishli sport jihozlari o‘g‘irlangani bo‘yicha surishtiruv boshlanganini tasdiqladi. Bu haqda Sky News xabar bermoqda.
Manbaga koʻra, jamoa Kanzas-Sitiga yetib kelganida transport vositasidagi ayrim buyumlar yo‘qolgani aniqlangan. Politsiya holat yuzasidan tergov olib bormoqda va ish bo‘yicha shubha uyg‘otgan ikki shaxs vaqtincha hibsga olingan.
Qayd etilishicha, yo‘qolgan buyumlar orasida Angliya yetakchilari Harri Keyn va Jud Bellingemning butsalari ham bor. Shuningdek, terma jamoa mashg‘ulotlarda foydalanadigan deyarli barcha to‘plaridan ayrilgani, ularning ixtiyorida faqat bitta to‘p qolgani xabar qilinmoqda.
Maʼlumot uchun, Angliya terma jamoasi Jahon chempionatidagi ilk uchrashuvini 17-iyundan 18-iyunga o‘tar kechasi Xorvatiyaga qarshi o‘tkazadi.
