Англия футбол ассоциацияси ФИФА режасини мустақил текширишни талаб қилди
Англия футбол ассоциацияси раиси ва ФИФА вице-президенти Дебби Хьюитт ФИФАнинг Жаҳон чемпионати ва бошқа йирик турнирлар тижорий ҳуқуқларининг бир қисмини хусусий инвесторларга беришни кўзлаган, кейинчалик бекор қилинган лойиҳаси юзасидан мустақил текширув ўтказишни талаб қилди. Хьюитт бу борада ФИФА президенти Жанни Инфантино ва ташкилот бош котиби Маттиас Графстрёмга расмий мактуб йўллаган. Бу ҳақда The Times нашри хабар бермоқда.
Манбага кўра, Хьюитт ФИФА раҳбариятидан лойиҳа қандай ишлаб чиқилгани, музокараларда кимлар иштирок этгани ва нима сабабдан ФИФА Кенгаши жараёндан етарлича хабардор қилинмаганига ойдинлик киритишни сўраган. Режа эркаклар ва аёллар ўртасидаги Жаҳон чемпионатлари каби мусобақаларнинг тижорий активларини бошқарувчи алоҳида компания ташкил этиб, унинг бир қисмини хусусий инвесторларга сотишни назарда тутган.
Дебби Хьюитт, шунингдек, АҚШ терма жамоаси ҳужумчиси Фоларин Балогуннинг ЖЧ-2026 вақтида олган бир ўйинлик дисквалификацияси кейинчалик тўхтатиб қўйилгани юзасидан ҳам батафсил тушунтириш талаб қилган. ФИФА аввалроқ инвестиция лойиҳаси бўйича жараён тўғри олиб борилмаганини тан олган ва текширув ўтказилишини билдирган, бироқ ушбу текширувни айнан ким амалга ошираётгани ошкор этилмаган.
Маълумот учун, ФИФАнинг бекор қилинган лойиҳаси компаниянинг тахминан 20 фоизлик улушини хусусий инвесторларга сотиш орқали қарийб 4,2 миллиард доллар жалб қилишни кўзлаган. Режага кўра, ФИФАга аъзо ассоциацияларга 20 миллион долларгача маблағ ажратилиши мумкин эди. Бироқ УЕФА, Осиё футбол конфедерацияси ва КОНКАКАФ лойиҳага қарши чиқиб, жараён юзасидан мустақил текширув ўтказишга чақирган.
