«Андижон». Македониянинг 11 карра чемпионлари бизнинг спарринг-рақибимиз
«Андижон» Анталия йиғини доирасида ташкил этилаётган ўртоқлик ўйинларининг навбатдагисига ҳам етиб келди.
Жамоа Македониянинг энг машҳур клубларидан бири — "Вардар"га қарши майдонга чиқади. Бу жамоа ўзининг бой тарихи ва курашчан ўйини билан ажралиб туради. Биз учун бу ўйин тайёргарлик даражамизни синаш ва жамоавий ўйинни янада мустаҳкамлаш учун муҳим имконият бўлади.
"Вардар" Македониянинг 11 карра чемпиони ҳисобланади. Бу борада “Вардар” ўз мамлакатида ягона. Яна 6 карра мамлакат Кубогини ҳам қўлга киритган.
Скопьенинг “Вардар” клубига 1947-йилнинг 22-июль куни асос солинган. Жамоани 51 ёшли Гоце Седлоски бошқариб бормоқда. У 2024-йилнинг ноябрь ойидан бери клубга устозлик қилмоқда.
Айни пайтда Македония чемпионатида 12 та жамоа иштирок этади. Биринчи даврадан кейин “Вардар” 42 очко билан пешқадам бўлиб турибди. Шунингдек, бу клуб европа кубокларида ҳам қатнашиб келади.
“Андижон” жамоасининг “Вардар”га қарши беллашуви 20-январ санада Тошкент вақти билан соат 18:30 да бошланади.
