Аморим: Энг ачинарли томони шуки, биз машқ қилган ҳолатлардан гол ўтказдик
Рубен Аморимнинг “Брентфорд”га қарши мағлубиятдан кейинги матбуот анжумани
— Ўйиндан олдин сиз футболчилар ўйинни тез бошлаш зарурлигини тушунишади, дегандингиз, аммо бугун дастлабки 20 дақиқада икки гол ўтказиб юбордингиз. Сабаби нимада? Одамлар яна “система”ни айтишмоқда…
— Ҳар доим бир хил гап: биз ютганимизда “системага алоқаси йўқ” дейишади, ютқазганимизда эса “системага боғлиқ” дейишади. Менимча, гап бошқа нарсада – биз “Брентфорд” хоҳлаган футболни ўйнадик. Узуна узатмалар қилдик, тўпни тепиб юбордик, иккинчи пасларни олишга уриндик, лекин ўйинни ўзимиз назорат қила олмадик. Тўлиқ ўз футболимизни кўрсата олмадик, рақиб прессинг қилганда жавоб қайтара олмадик. Шу сабабли иккита гол ўтказдик. Пеналти вазиятни ўзгартириши мумкин эди, лекин умумий олганда ўйинни назорат қила олмадик.
— Сиз аллақачон 30 дан ортиқ ўйин ўтказгансиз Премьер Лигада. Асосий принциплари ишламаётганини ҳис қилмайсизми?
— Мен биламан, йигитлар – бу мавзу ҳар сафар мағлуб бўлсак кўтарилади. Олдимизда ҳали кўп иш бор. Бугун мени кўпроқ ташвишга солгани – биз ўйинга кира олмадик. Жуда кўп кросслардан гол ўтказдик, қарши ҳужумларда ҳам гол ўтказдик, бундан яхши хабардор эдик ва бутун ҳафта шу устида ишладик. Демак, яна шу устида ишлашимиз керак.
— Уни қандай ўзгартириш мумкин? Қандай қилиб барқарорликка эришиш мумкин?
— Фақат ишлаш, яна ишлаш. Энг ачинарли томони шуки, биз машқ қилган ҳолатлардан гол ўтказдик. Бу хафа қилади. Тўп билан яхшироқ ўйнашимиз мумкин, ўйинни кўпроқ ўз қўлимизга олишимиз мумкин. Ҳа, баъзан қарорлар бизнинг фойдамизга эмас, лекин ўйинни барқарорлаштириш ўз қўлимизда. Биламан, бу жамоа бунга қодир. Лекин вазиятлар қарши бўлганда – пеналти, биринчи голдан олдинги қоида бузилиши – ўйинчиларнинг шахсий маҳорати ёрдам бериши керак бўлади.
— Коллинсни майдондан четлатилмагани сизни ҳафсалангизни пир қилмадими?
— Йўқ, мен шунчаки баъзида қарорлар бизнинг фойдамизга бўлмайди, дедим. Бу футболнинг бир қисми. Биз барибир ўйинни қўлга олишимиз мумкин эди, лекин қила олмадик. Ҳакам Мбеумо тўпни назорат қилмади деди, лекин у назорат қилмади, чунки уни тортиб юборишди. Аммо қарор – қарор. Биз ҳакамга ёпишиб олишимиз эмас, ўзимиз яхшироқ ўйнашимиз керак эди.
— Сиз ҳали ҳаммасини тўғрилай олишингизга ишонасизми?
— Бу баъзан олдинга, баъзан орқага ташланган қадамга ўхшайди. Ғалаба бўлса – кайфият бошқача, мағлуб бўлсак – яна орқага қайтиб, кейинги ғалабани излайсан. Лекин мен ҳар доим ўзимга ишонаман, чунки нима қилишни биламан.
— Бугун кўп индивидуал хатолар бўлди. Сизча, футболчилар ҳам масъулиятни ўз зиммасига олиши керакми?
— Мен бу ерда футболчиларни ҳимоя қилиш учун эмасман. Вазифам – клуб ва жамоа учун энг яхшисини қилиш. Машғулотларда уларнинг ишлашини кўряпман. Қийин ўйинларда ҳаммаси режадагидек кетмаслиги мумкин – бу “Юнайтед”даги босимнинг бир қисми. Мен на футболчиларни, на ўзимни оқлашни хоҳламайман. Фақат кейинги ўйинда қандай ғалаба қозонишни ва жамоага импульс бериб юборишни ўйлайман. Бугун эса биз “Брентфорд” футболини ўйнадик, ўзимизникини эмас. Рақиб истаган футболни ўйнасанг, ютуш қийинлашади.
— Сиз барибир тараққиёт бўлишига ишонасизми? Чунки ҳозир жамоа гоҳида олдинга, гоҳида орқага қадам ташлаётгандек кўринмоқда…
— Йигитлар, мен сизларга ҳар сафар мағлуб бўлганимиздаги бир хил гапни айтаман. Баъзида ўсишни кўрамиз, жамоа яхши ўйнайди, баъзида эса йўқ. Шунинг учун суҳбатимиз ҳар сафар бир хил бўлиб қолади. Ҳаммаси кейинги ўйинга боғлиқ. Уни ютушимиз керак. Лекин аниқки, биз кўпроқ ҳужумлар яратишимиз мумкин. Баъзида кўпроқ ҳужум зоналарига кирамиз, баъзида эса охирги пас ёки зарбада бироз сифат етмайди. Шу устида яна ишлаш керак бўлади.
