Америкалик инвесторлар «Наполи»ни сотиб олмоқчи
Америка консорциуми «Наполи» клубини сотиб олишга фаол уринаётир. The Athletic хабарига кўра, айни пайтда «Underdog Global Partners» (UGP) инвесторлар гуруҳи музокараларни давом эттирмоқда. Гарчи клуб хўжайини Аурелио Де Лаурентис неаполликларни сотишни режалаштирмаган бўлса-да, бу ҳолат UGP’ни фикридан қайтаргани йўқ. Томонлар ўртасидаги музокаралар мана олти ойдирки давом этмоқда.
UGP компанияси Италия спортига бегона эмас, уларнинг бу мамлакатда ўз инвестициялари мавжуд. Хусусан, компания Италия учинчи дивизиони вакили «Кампобассо» клубининг мажоритар (назорат) акциялар пакетини эгаси ҳисобланади. Шунингдек, ўтган йилнинг май ойида UGP «Наполи» баскетбол жамоасининг ҳам назорат акцияларини сотиб олган эди. Консорциум 2027 йилда старт олиши кутилган NBA шафелигидаги Европа Лигасида иштирок этиш учун ариза топширишни режалаштирган. Шундай қилиб, футбол ва баскетбол жамоаларини ягона кўпспортли (мултиспорт) тузилма остида бирлаштириш кўзда тутилган.
UGP тақдим этган таклифда инфратузилмага жиддий сармоя киритиш, жумладан, «Диего Армандо Марадона» стадионини хусусийлаштириш ҳамда реконструкция қилиш мажбурияти ҳам ўрин олган. Бироқ манбанинг таъкидлашича, бир нечта баҳсли бандлар сабабли музокаралар ҳозирча боши берк кўчага кириб қолган. Шунга қарамай, UGP ўзаро келишмовчиликларни бартараф этишга ва Де Лаурентис билан мулоқотни қайта тиклашга умид қилмоқда.
