Алваро Арбелоа Винисиус Жуниорнинг келажаги ҳақида гапирди: «Умид қиламанки, у Мадридда қолади»
Бразилиялик футболчининг «Реал» билан тузган амалдаги шартномаси 2027 йилнинг ёзига қадар амал қилади.
ФОТО: Getty Images
Мадриднинг «Реал» клуби бош мураббийи Алваро Арбелоа жамоа ҳужумчиси Винисиус Жуниорнинг шартномасини узайтириш борасидаги саволга жавоб берди. Бу ҳақда таниқли инсайдер Фабрисио Романо маълум қилди.
«Винисиус билан шартномани узайтириш? Умид қиламанки, у «Реал»да қолади, буни жуда истайман. Мухлислар уни чин дилдан яхши кўришади», — дея Арбелоанинг сўзларини келтирмоқда Романо.
Бразилиялик ҳужумчи ва клуб ўртасидаги амалдаги келишув 2027 йилнинг июн ойи охиригача амал қилади. Transfermarkt портали 25 ёшли футболчининг бозор қийматини 150 миллион евро деб баҳоламоқда.
Маълумот учун, Винисиус Жуниор жорий мавсумда клуб миқёсида барча турнирлар доирасида 48 та учрашувда майдонга тушиб, 18 та гол урди ва 14 та голли узатмани амалга оширди.
Насрулло Каримов
Журналист