Алваро Арбелоа: «Роналдунинг натижаларини кимдир янгилай олса, бу фақат Мбаппе бўлади»
Мадриднинг «Реал» клуби бош мураббийи Алваро Арбелоа жамоа ҳужумчиси Килиан Мбаппени дунёнинг айни дамдаги энг яхши футболчиси деб атади ва франциялик форвард «қаймоқранглилар»нинг собиқ юлдузи Криштиану Роналдудан ўтиб кетиши мумкинлигини таъкидлади.
— «Реал» мураббийи сифатида ихтиёрингизда Мбаппе борлиги сиз учун нима англатади ва у Роналдунинг натижаларидан ўза оладими?
«Бу мен учун улкан омад, чунки айни дамда у дунёнинг энг яхши футболчиси ва буни кундан-кунга, ўйиндан-ўйинга исботлаб келмоқда. Аввал ҳам айтганимдек, Криштианунинг ютуқлари ўзга сайёраликлардек, ҳеч ким эриша олмайдиган чўққидек туюларди. Мбаппенинг олдида ҳали узоқ йўл турибди, чунки Криштиану бу ерда кўп йиллар давомида ўйнаган. Аммо Килианда унинг изидан бориш учун барча шароитлар мавжуд ва у Роналдудан ўтиб кета оладими-йўқми, буни вақт кўрсатади. Лекин агар буни кимдир уддалай олса, у фақат Килиан бўлади», — дея Арбелоанинг сўзларини келтирмоқда «Реал» расмий сайти.
Жорий мавсумда Мбаппе барча мусобақаларда 31 та ўйинда иштирок этиб, ўз ҳисобига 38 та гол ва 5 та самарали узатмани ёздириб қўйди. Франциялик футболчи 2024 йилдан буён Мадрид клуби шарафини ҳимоя қилиб келмоқда. Унинг клуб билан шартномаси 2029 йилга қадар мўлжалланган.
