Алвареснинг “Барселона”га ўтиш эҳтимоли баҳоланди - Ромеро
“Барселона”нинг “Атлетико Мадрид” ҳужумчиси Хулиан Алваресни трансфер қилиш имконияти жуда паст. Таниқли журналист Жерар Ромеро аргентиналик футболчининг Каталония клубига ўтиш эҳтимолини атиги 0,5 фоиз деб баҳолади.
“Менимча, Алваресни сотиб олиш жуда ва жуда қийин бўлади. Унинг трансфер эҳтимолини 0,5 фоиз деб баҳолаган бўлардим”, — деди Ромеро. Бунга асосий сабаб “Атлетико”нинг ҳужумчини Ла Лигадаги бевосита рақибига сотишни истамаяптгани ҳисобланади.
Алвареснинг ўзи эса фаолиятини “Барселона”да давом эттиришни хоҳлаётгани ҳақида хабарлар тарқалган. Шунга қарамай, Мадрид клуби ўз позициясини ўзгартирмаяпти ва аргентиналик футболчини каталонияликларга қўйиб юборишни режалаштирмаяпти.
Маълумот учун, Алвареснинг “Атлетико” билан амалдаги шартномаси 2030 йилгача мўлжалланган. Ҳужумчига “Арсенал” ҳам жиддий қизиқиш билдирмоқда, бироқ футболчининг асосий истаги “Барселона”га ўтиш экани айтилмоқда.
