Альварес ёзда «Атлетико»ни тарк этиши мумкин
“Атлетико” ҳужумчиси Хулиан Альварес аллақачон шу ёзда клубини алмаштириши мумкин. Бу ҳақда журналист Фабрицио Романо ўзининг Х (Twitter) ижтимоий тармоғида хабар берди.
Манба маълумотига кўра, аргентиналик форварднинг амалдаги шартномаси 2030 йилгача амал қилса-да, у ҳозирча мадридликлар раҳбарияти билан янги битим борасида аниқ музокаралар олиб бормаяпти.
Альваресга “ПСЖ”, “Барселона” ҳамда Англия Премьер-лигасининг бир нечта клублари қизиқиш билдирмоқда. Шу билан бирга, жиддий таклифлар тушган тақдирда «Атлетико» учун футболчини жамоада сақлаб қолиш осон бўлмаслиги таъкидланмоқда.
Альварес Мадрид клубига 2024 йил ёзида “Манчестер Сити”дан ўтган эди. Жорий мавсумда у 49 та ўйинда иштирок этиб, 20 та гол урди ва 9 та голли узатма амалга оширди.
