Алварес “Атлетико” раҳбариятидан норози — у агентининг кескин баёнотини қўллаб-қувватлади
“Атлетико Мадрид” ҳужумчиси Хулиан Алварес ва клуб раҳбарияти ўртасидаги келишмовчилик кучайиб бормоқда. Аргентиналик футболчининг агенти Фернандо Идалго клуб бош директори Мигел Анхел Хил Маринни ёлғонда айбловчи мазмунда пост эълон қилган. Алварес эса агентининг бу чиқишини тўлиқ қўллаб-қувватлаган.
Идалго ижтимоий тармоқдаги постида ёлғончилар ҳақида кескин фикр билдирган. Маълумотларга кўра, бу баёнот “Атлетико” раҳбариятига, хусусан Хил Маринга қаратилган. Алварес ҳам клуб директорининг тутган позициясидан қаттиқ норози экани айтилмоқда.
Томонлар ўртасидаги зиддиятнинг асосий сабаби футболчининг “Барселона”га ўтиш истаги билан боғлиқ. Алварес фаолиятини Каталония клубида давом эттиришни хоҳламоқда, бироқ “Атлетико” уни Ла Лигадаги бевосита рақибига сотишни истамаяпти. Ҳужумчи бошқа клублардан кўра айнан “Барселона” вариантини устун кўрмоқда.
Маълумот учун, 26 ёшли Алвареснинг “Атлетико” билан шартномаси 2030 йилгача амал қилади. Мадрид клуби аввал ҳам футболчини сотиш нияти йўқлигини билдирган, унинг шартномасидаги товон пули эса 500 миллион еврони ташкил этади.
