Алонсо «Челси»нинг барча трансферлар жараёнларини вқтинча тўхтатди
“Челси” янги бош мураббий Хаби Алонсо тайинланганидан сўнг барча трансфер жараёнларини вақтинча тўхтатишга қарор қилди. Бу ҳақда Sport.es хабар бермоқда.
Манбага кўра, лондонликлар аввал таркиб масаласини испаниялик мутахассис билан биргаликда муҳокама қилиб олишни режалаштирмоқда. Шундан сўнггина клуб трансфер бозоридаги ҳаракатларини давом эттиради.
Бу ҳолат “Барселона”нинг Жоао Педрони сотиб олиш борасидаги уринишларига тўсқинлик қилмоқда. Таъкидланишича, бразилиялик ҳужумчи Алонсо режаларига кириши мумкин ва шу сабаб унинг трансфери ноаниқ ҳолатда қолмоқда.
Каталония клубида футболчининг умуман сотилмаслиги эҳтимоли ҳам инобатга олинмоқда. Агар трансфер амалга ошадиган бўлса, «Барселона»га тахминан 100 миллион евро тўлашга тўғри келади.
Эслатиб ўтамиз, “Челси” 17 май куни Алонсо тайинланганини расман эълон қилди. Баёнотда у жамоада менежер сифатида ишлаши, яъни мураббийга нисбатан кенгроқ ваколатларга эга бўлиши қайд этилган.
