Алиссон «Ливерпул» таркибидаги 100-«қуруқ» ўйинини ўтказди
Англия Премьер-лигасининг 19-тури доирасида «Лидс Юнайтед»га қарши ўтказилган учрашув (0:0) «Ливерпул» дарвозабони Алиссон Беккер учун муҳим юбилей билан ёдда қолди.
Мазкур баҳс бразилиялик голкипер учун клуб сафида Англия чемпионатидаги 100-«қуруқ» ўйин бўлди. Бу ҳақда «Ливерпул» матбуот хизмати X ижтимоий тармоғида маълум қилди.
Жорий мавсум Англия Премьер-лигасида 33 ёшли Алиссон Беккер 14 та учрашувда майдонга тушиб, шулардан 5 тасида дарвозасини дахлсиз сақлаб қолди. Шунингдек, у Чемпионлар лигасида 3 та ўйинда иштирок этиб, 1 марта «қуруқ» ўйин қайд этган.
Ҳозирда «Лидс Юнайтед» Англия чемпионати турнир жадвалида 16-ўринни эгаллаб турибди. Жамоа 19 та учрашувдан сўнг 21 очко жамғарган. «Ливерпул» эса 33 очко билан тўртинчи поғонада жойлашган. Турнир жадвалида пешқадамликни 45 очкога эга «Арсенал» сақлаб қолмоқда.
