Александар Станкович «Интер»га қайтди
“Милан”нинг “Интер” клуби ўз расмий сайтида ярим ҳимоячи Александар Станкович билан шартнома имзолаганини эълон қилди.
Италия клуби сербиялик футболчини “Брюгге”дан қайтариб сотиб олиш бандини фаоллаштирди. Станкович “Интер” билан 2031 йилнинг ёзига қадар шартнома имзолади.
Александар Станкович 20 ёшда, у “Милан”нинг “Интер” клуби тарбияланувчиси ҳисобланади. Сербиялик ҳавбек 2025 йилнинг ёзидан буён “Брюгге” сафида тўп суриб келаётганди. У бир йил ичида 55 та ўйинда майдонга тушиб, тўққизта гол урди ва бешта голли узатмани амалга оширди.
Аввалроқ ОАВ “Интер” Станковични “Брюгге”дан 23 миллион евроға қайтариб сотиб олиши, бироқ футболчининг клубда қолмаслиги мумкинлиги ҳақида хабар берганди. Унга “Брентфорд” қизиқиш билдирган. “Интер” Станковични 40 миллион евроға баҳоламоқда.