Aleksandar Stankovich «Inter»ga qaytdi
“Milan”ning “Inter” klubi o‘z rasmiy saytida yarim himoyachi Aleksandar Stankovich bilan shartnoma imzolaganini e’lon qildi.
Italiya klubi serbiyalik futbolchini “Bryugge”dan qaytarib sotib olish bandini faollashtirdi. Stankovich “Inter” bilan 2031-yilning yoziga qadar shartnoma imzoladi.
Aleksandar Stankovich 20 yoshda, u “Milan”ning “Inter” klubi tarbiyalanuvchisi hisoblanadi. Serbiyalik xavbek 2025-yilning yozidan buyon “Bryugge” safida to‘p surib kelayotgandi. U bir yil ichida 55 ta o‘yinda maydonga tushib, to‘qqizta gol urdi va beshta golli uzatmani amalga oshirdi.
Avvalroq OAV “Inter” Stankovichni “Bryugge”dan 23 million yevroga qaytarib sotib olishi, biroq futbolchining klubda qolmasligi mumkinligi haqida xabar bergandi. Unga “Brentford” qiziqish bildirgan. “Inter” Stankovichni 40 million yevroga baholamoqda.
