Альберт Риера «Айнтрахт» бош мураббийига айланишга яқин турибди — манба
Испаниялик мутахассис Альберт Риера тез орада Германия Бундеслигада иш бошлаши кутилмоқда. Таниқли инсайдер Николо Скирани ижтимоий тармоқлардаги саҳифасида хабар беришича, мураббий Франкфуртнинг «Айнтрахт» жамоасини бошқаришга жуда яқин турибди.
«Альберт Риера «Айнтрахт»нинг янги бош мураббийи этиб тайинланиш остонасида. Томонлар 2028 йилгача мўлжалланган шартномани имзолашга тайёр», — деб ёзади Скира.
43 ёшли Риера 2024 йилдан буён Словениянинг «Селе» клубини бошқариб келмоқда. Бунгача у Франциянинг «Бордо» жамоасида ҳам фаолият юритган.
Франкфуртликлар айни дамда Германия чемпионати турнир жадвалида 19 ўйиндан сўнг 27 очко билан 8-ўринни эгаллаб турибди. «Айнтрахт»нинг халқаро майдондаги ишлари эса анча омадсиз чиқди — жамоа Чемпионлар Лигасининг умумий босқичида 33-ўринни эгаллаб, плей-офф йўлланмасидан қуруқ қолди.
