Алаба «Удинезе»га ўтиш бўйича келишувга эришди
Австриялик ҳимоячи Давид Алаба фаолиятини Италия чемпионатида давом эттиради. 34 ёшли футболчи «Удинезе» клубига ўтиш бўйича келишувга эришди. Бу ҳақда журналист Фабрицио Романо ижтимоий тармоқларда маълум қилди.
Манбага кўра, томонлар трансфер шартларини оғзаки равишда тўлиқ келишиб олган. Энди битимни расмийлаштириш учун зарур юридик жараёнларни якунлаш қолган. Шундан сўнг Алабанинг «Удинезе» футболчисига айлангани расман эълон қилинади.
Аввалроқ ОАВда австриялик ҳимоячининг хизматларига Италиянинг «Рома» ва «Лацио» клублари, шунингдек, Испаниянинг «Барселона»си қизиқиш билдиргани ҳақида хабарлар тарқалган эди. Бироқ Алаба фаолиятини «Удинезе»да давом эттиришга қарор қилди.
Алаба 2021 йилдан 2026 йилга қадар Мадриднинг «Реал» клуби шарафини ҳимоя қилди. Ушбу давр мобайнида ҳимоячи барча турнирларда 132 та учрашувда майдонга тушиб, 5 та гол ва 9 та голли узатма қайд этди.
