“Ал-Садд” Брозович билан шартнома имзолашга яқин
Қатарнинг “Ал-Садд” клуби хорватиялик ярим ҳимоячи Марсело Брозович билан шартнома имзолашга яқин турибди. 33 ёшли футболчи ҳозирда эркин агент мақомида ва янги клубига бепул қўшилиши мумкин.
Инсайдер Николо Скиранинг маълумотига кўра, томонлар келишувни якунлаш арафасида. “Ал-Садд” Брозович билан музокаралар муваффақиятли тугашига ишонмоқда. Футболчига 2028-йилгача мўлжалланган шартнома таклиф қилинмоқда.
Брозовичнинг сўнгги клуби Саудия Арабистонининг “Ал-Наср” жамоаси бўлган. Унинг шартномаси 2025/26-йилги мавсум якунида тугаган ва шундан сўнг футболчи эркин агентга айланган. Ўтган мавсум Саудия чемпионатида у 29 та учрашувда майдонга тушиб, 4 та голли узатма амалга оширган.
Маълумот учун, Брозович “Ал-Наср”га 2023-йилда Миланнинг “Интер” клубидан ўтган эди. Бунгача хорватиялик ярим ҳимоячи “Интер” сафида саккиз йилдан ортиқ вақт давомида тўп сурган.
