Акмал Шорахмедов: Суперлигада қолиш ва Осиё Чемпионлар лигасида ғалаба қозониш учун бундан яхшироқ ўйин кўрсатишимиз керак
“Андижон” - “Хоразм” (3:2) учрашувидан кейинги матбуот анжуманида бурғулларнинг вақтинчалик бош мураббийи Акмал Шорахмедов иштирок этди ва ОАВ вакилларининг саволларига жавоб қайтарди.
- Ўйин жуда муҳим эди. “Хоразм” учун ҳам охирги имконият эди. Шу боис учрашувнинг олдиндан қийин ўтишини билардик. Ярим ҳимояда муаммоларимиз кўп эди. Иккинчи тайм шундай бўлишини ҳам билардик. Мен камдан-кам ўйиндан қониқаман. Ютган бўлсак ҳам, ҳали ишлайдиган ишларимиз кўп. Муҳими, натижа. Аммо Суперлигада қолиш ва Осиё Чемпионлар лигасида ғалаба қозониш учун бундан яхшироқ ўйин кўрсатишимиз керак. Натижадан қониқдим, ўйиндан қониқмадим. Йигитларга ечиниш хонасида айтдим, бундан яхшироқ ўйнашимиз керак. Кунимиз кам. Барибир “Аркадаг”га қарши учрашувга яхшироқ ҳолатда чиқишга ҳаракат қиламиз.
- Иккинчи бўлимда жамоа эрта ҳимояга ўтди. Шунинг учун иккинчи гол ўтказилди. Охирида эса Ислом Мамадказин туширилди ва 5 та ҳимоячигa ўтилди. Бу ҳақда қандай фикрдaсиз?
- Очиқ айтишимиз керак, ҳужумда кучайтирaдиган ўйинчимиз йўқ. Захирада ёш футболчилар бор. Лекин менинг фикримча, улар ҳозирча бизга ёрдам бера олмайди. Бақувват, жуссаси катта футболчиларга қарши ёш йигитларни туширишдан кўра 5 та ҳимоячигa ўтишни тўғрироқ деб ўйладим. Охирида натижа учун ўйнадик, буни тан оламиз. Биринчи бўлимда тезкор футболчиларимиз ўйнади. Иккинчи таймда тезкор йигитларни алмаштирганимиздан сўнг ўйинни бериб қўйдик.
- Бектемир Абдуманонов доим қанот ўйинчиси ҳисобланади. Бугунги учрашувда эса ўртада ўйнади. Бу айнан футболчилар йўқлиги сабаблими?
- Фақат бу сабаб эмас. Жамоада ярим йилдан бери ишлаб келяпман. Ўзим уни олдиндан ўртада ҳам ўйнатишни хоҳлардим. Бектемирнинг ўзи ҳам билади, ундан ўртада ўйнашни билсанми деб сўраганимда “Олимпик”да ҳам ўртада ўйнаганини айтди. Муҳаммадкарим Тоиров тўртинчи сариқ карточкаси туфайли бу ўйинни ўтказиб юбориши аниқ бўлганидан сўнг, икки кун давомида Бектемирни марказда тайёрладик. Бизга ўртада тезкор, креатив ўйинчи керак. Ҳужумни тезлаштирадиган футболчи сифатида уни танладик. Менимча, биринчи таймда кўпроқ фойда берди. Бундан кейин ҳам уни ўша позицияда ўйнатамиз.
- 26-ноябрь куни “Андижон”ни “Аркадаг”га қарши яна бир муҳим ўйин кутиб турибди. Яна дуранг бўлса, жамоа гуруҳда қолиб кетиши мумкин.
- Буни ўзимиз ҳам биламиз. Бугунги учрашувда ҳам таваккал қилиб учта ҳужумчи билан тушдик. Қаердадир орқада ҳам таваккал қилдик. Лекин натижасини берди. “Аркадаг”га қарши бошқача ўйин схемаларини ўйлаб қўйганмиз. Қўлдан келганича ҳаракат қиламиз. Менимча, “Аркадаг” ҳам ўйин борасида “Хоразм”дан у қадар кучли эмас. “Аркадаг”да жисмонан бақувват ўйинчилар бор. Бўлажак учрашувга тайёрланиш учун вақтимиз бор. Ҳужумкор ўйин кўрсатишга ҳаракат қиламиз. Бу охирги имкониятимиз. Таваккал қиламиз.
- Дебютини ўтказган Аббос Абдуғаффоровнинг ўйини ҳақида қандай фикрингиз бор?
- Кўряпсизлар, бизда таянч ярим ҳимоясида ўйинчиларимиз йўқ. Бу болани U21 ўйинига бориб кузатганимда менга ёқиб қолганди. Шунинг учун қўрқмасдан асосий таркибда туширдик. Агар ўзимга ёқса, кимнидир асосий таркибда майдонга туширишдан қўрқмайман.
