Акмал Мозговой: Охиригача қўллаб-қувватлашингизни сўраймиз
Ўзбекистон футбол ассоциацияси матбуот хизмати яримҳимоячи Акмал Мозговой билан суҳбат уюштирди.
«Жамоамиздаги кайфият аъло даражада. Ҳамма кутяпти. Мухлислар каби ўзимиз ҳам турнир бошланишини кутяпмиз. Тарихда биринчи бор жаҳон чемпионатининг финал босқичига чиқа олдик. Жуда ажойиб воқеа бўлди. Ҳамма учун муҳим. АҚШдаги йиғин ҳам яхши ўтяпти. Катта жамоаларга қарши ўртоқлик ўйинлари ташкиллаштирилди.
Туйғуларни айтишга тил ожиз. Ёшликдан катта-катта футболчиларни телевизор орқали кўриб келганмиз. Худо хоҳласа, энди эса уларга қарши ўйнаймиз. Айтиб ўтганимдек, кайфият аъло даражада. Ҳамма бошланишини кутяпти. Худо хоҳласа, яхши ўйин кўрсатиб, мухлисларни хурсанд қилишга ҳаракат қиламиз. Ҳам АҚШда, ҳам Ўзбекистонда бизни кўпчилик қўллаб-қувватлайди. Бу қўшимча ёрдам бўлади, деб ўйлайман.
Катта гранд жамоаларга қарши бу баҳслар ҳам жисмоний жиҳатдан, ҳам руҳий жиҳатдан улкан тажриба бўлади. Майдонга тушганда шу мураббийлар кўрсатмалари бўйича ҳаракат қиламиз.
Мақсадим имкониятдан келиб чиқиб кўпроқ ўйнаш, ўзимни кўрсатиш. Жамоавий ўрин биринчи ўринда. Жамоа ижобий натижа кўрсатиб, гуруҳдан чиқиб, максимал равишда ҳаракат қилиш.
Ҳаммага катта раҳмат. Охиригача қўллаб-қувватлашингизни сўраймиз. Биз буни ҳис қилиб турибмиз», - деди Мозговой.
