Aichi-Nagoya-2026: Ўзбекистон U-23 бронза медалидан ҳам қуруқ қолди
Ўзбекистон U-23 терма жамоаси Aichi-Nagoya-2026 Осиё ўйинларининг бронза медали учун баҳсида Хитойга пеналтилар сериясида имкониятни бой берди. Учрашувнинг асосий вақти 2:2 ҳисобида якунланган бўлса, пеналтилар сериясида Хитой 4:3 ҳисобида ғалаба қозонди.
Ҳисоб 15-дақиқада Hu Hetao томонидан очилди. 43-дақиқада Сардор Баҳромов аниқ зарба билан мувозанатни тиклади — 1:1. Иккинчи бўлимнинг 54-дақиқасида Wang Yudong узоқ масофадан чиройли гол уриб, Хитойни яна олдинга олиб чиқди.
Ўзбекистон учрашув сўнггида мағлубиятдан қутулиб қолди. 90-дақиқада Шодиёр Шодибоев дарвозабон қайтарган тўпни дарвозага жойлаб, ҳисобни 2:2 кўринишига келтирди. Дастлаб гол офсайд сабаб бекор қилинган бўлса-да, VAR текширувидан кейин гол инобатга олинди. Пеналтилар сериясида эса Хитой 4:3 ҳисобида устун келди.
Маълумот учун, Ўзбекистон U-23 терма жамоаси ярим финалда ҳам Японияга қарши 1:1 ҳисобида дуранг ўйнаб, пеналтилар сериясида 8:9 ҳисобида мағлуб бўлган эди. Шу тариқа Равшан Ҳайдаров шогирдлари Осиё ўйинларини 4-ўринда якунлади.
