Агар Бернарду Силва «Барселона»га келса, Решфорд жамоадан кетади
«Барселона» клуби томонидан ярим ҳимоячи Бернарду Силванинг эҳтимолий трансфери «Манчестер Юнайтед»дан ижарага олинган қанот ҳужумчиси Маркус Решфорднинг жамоада қолиш имкониятини бутунлай йўққа чиқаради. Бу ҳақда Sport.es нашри хабар бермоқда.
Манбанинг таъкидлашича, португалиялик футболчининг келиши ҳамда «Ньюкасл»дан вингер Энтони Гордоннинг кутилган трансфери сабабли «таркибда инглиз ҳужумчиси учун жой қолмайди».
Сўнгги вақтларда «кўк-анорранглилар» ва Силванинг агенти ўртасидаги музокаралар сезиларли даражада ижобий томонга силгаган. «Барселона»га текинга (эркин агент мақомида) ўтиши мумкин бўлган яримҳимоячининг маоши клуб учун муаммо туғдирмайди.
30 июн куни Бернардунинг 2017 йилдан буён тўп суриб келаётган «Манчестер Сити» билан шартномаси якунга етади. Якунланаётган мавсумда португалиялик футболчи барча турнирларда 53 та ўйинда майдонга тушиб, 3 та гол ва 5 та голли узатмани ўзи ҳисобига ёздириб қўйди.
