Агар «Арсенал» жорий мавсум биронта соврин юта олмаса, Артета истеъфога чиқарилиши мумкин
Mundo Deportivo нашрининг хабар беришича, агар «Арсенал» жорий мавсумда Англия Премьер-лигаси ёки Чемпионлар Лигасида ғолиб чиқа олмаса, жамоа бош мураббийи Микел Артета ўз лавозимидан озод этилиши мумкин.
Лондон клуби раҳбариятида бундай шубҳалар пайдо бўлишига сўнгги бир неча мавсум давомида таркибни кучайтириш учун катта маблағ сарфланганига қарамай, жамоанинг йирик совринларни қўлга кирита олмаётгани сабаб бўлмоқда.
Хабарларга кўра, клуб мутасаддилари испаниялик мутахассис ўрнига муносиб номзод ҳам топиб улгуришган. Бу ўринга айни дамда Италиянинг «Комо» клубини бошқараётган ва жамоаси билан Европа кубоклари йўлланмаси учун кураш олиб бораётган Сеск Фабрегас номзоди кўриб чиқилмоқда.
Маълумот учун, Микел Артета 2019 йилдан буён «Арсенал»ни бошқариб келмоқда. Унинг клуб билан амалдаги шартномаси 2027 йилнинг 20 июнига қадар имзоланган.
