Афсоналар беллашуви: Ўзбекистон ва Россия фахрийлари дуранг қайд этди
14 август куни Ўзбекистон ва Россия фахрийлари ўртасидаги ўртоқлик учрашуви байрамона кайфият ва муросасиз кураш руҳида ўтди. Қизиқарли эпизодларга бой беллашув 2:2 ҳисобида якунланди. Трибуналарда қўллаб-қувватлаш баланд, майдонда эса ҳурмат ва спорт руҳи устувор бўлди.
Гол муаллифи Тимур Кападзе ўйиндан сўнг майдонда афсоналар билан бирга бўлишдан мамнун эканини таъкидлади:
“Ёшлигимиздан ҳавас қилган футболчилар билан бирга тўп тепганимиз катта шараф. Байрам-байрамдек бўлди. Дасаевга гол ураман деган ният билан майдонга тушдим — бу алоҳида завқ, чунки у ўз даврининг энг яхши дарвозабони эди. Энг муҳими, ўйин яхши ўтди”.
Кападзенинг бу сўзлари беллашув муҳитининг моҳиятини ифодалади — афсоналарга ҳурмат, болаликдаги идеалларга яқин туриш ҳисси ва ўйиндан олинган ҳақиқий завқ.
