AFA расмий аккаунтлари мисрлик хакерлар томонидан бузиб кирилди
Аргентина футбол ассоциацияси (AFA) расмий аккаунтлари мисрлик хакерлар ҳужумига учради. Бу ҳақда MDZ Radio нашри хабар бермоқда.
Ушбу воқеа ЖЧ-2026 турнирининг 1/8 финалида Аргентина терма жамоаси Мисрни 3:2 ҳисобида мағлуб этганидан сўнг содир бўлди. Ўшанда Миср футбол федерацияси ўйинни бошқарган франциялик ҳакам Франсуа Летекс бошчилигидаги бутун бригада қарорларидан норози бўлиб, уларни турнирдан четлатишни талаб қилганди.
Маълум қилинишига, хакерлар ассоциация маълумотлар базасининг бир қисмига, жумладан, электрон почта ва IP-манзиллар ҳамда паролларга кириш ҳуқуқини қўлга киритишган.
Киберҳужумдан сўнг, AFAда аккредитациядан ўтган бир нечта журналистларга “AFA Medios” деб расмийлаштирилган почтадан электрон хатлар келган. Мисрлик хакерлар гуруҳига тегишли экани айтилаётган хат матнида ҳакамлик шубҳа остига олинган ва шундай дейилган: “Ўғрилик эътиборсиз қолмайди”. Шунингдек, хабарда: “Агар майдонда адолат бўлмаса, ижтимоий тармоқларингизда тинчлик кутманг”, дея таҳдид қилинган.
AFA ўз аккаунтидан бундай хабарлар юборилгани эҳтимолини тасдиқлади, бироқ бу хат ташкилот томонидан ёзилмагани ва бунга рухсат берилмаганини таъкидлади. Ассоциация вакиллари тизимга ноқонуний кириш ҳолати бўйича суриштирув бошланганини маълум қилиб, воқеа кўлами тўлиқ аниқланмагунча, журналистлардан ҳар қандай шубҳали хатларга эътибор бермасликни сўрашди.
