Адриен Трюффер «Манчестер Юнайтед»га ўтишга тайёр
«Борнмут»нинг чап қанот ҳимоячиси Адриен Трюффер фаолиятини «Манчестер Юнайтед»да давом эттириши мумкин. Инсайдер Экрем Конур маълумотига кўра, манкунианликлар 24 ёшли франциялик футболчини кузатмоқда ва унга жиддий қизиқиш билдирмоқда. Трюффернинг ўзи ҳам «Олд Траффорд»га кўчиб ўтиш вариантига қарши эмас.
Бироқ трансфер осон кечмаслиги кутилмоқда. «Борнмут» ўз етакчи футболчиларини арзон нархда қўйиб юбормаслик сиёсатини юритмоқда ва Трюффер ҳам клубнинг муҳим футболчиларидан бири ҳисобланади. Аввалроқ инглиз манбаларида ҳимоячининг қиймати 60 млн фунт атрофида баҳоланаётгани ҳақида хабарлар тарқалган эди.
Франциялик ҳимоячи жорий мавсумда барча мусобақаларда 6 та учрашувда майдонга тушиб, битта голли узатма амалга оширган. У 2025-йил ёзида «Ренн»дан «Борнмут»га келиб қўшилган ва қисқа вақт ичида жамоанинг асосий чап қанот ҳимоячисига айланган.
Маълумот учун, Трюффернинг «Борнмут» билан амалдаги шартномаси 2030-йилгача мўлжалланган. Шу сабаб «Манчестер Юнайтед» футболчини қўлга киритиш учун жанубий соҳил клубининг юқори молиявий талабларини қондиришига тўғри келиши мумкин.
