Аббосбек Файзуллаев: Николичнинг кетиши ўйин услубига қайтиш имконини берадими?
Россия чемпионатида бронза медали ва мамлакат Кубогини қўлга киритган серб мутахассиси Марко Николич ЦСКАдаги фаолиятини якунламоқда. Mozzart Sport нашрига кўра, у яқин кунларда Грециянинг АЕК (Афина) клуби бош мураббийи этиб тайинланади. Томонлар икки йиллик шартномага келишиб олган, афиналиклар эса ЦСКАга 600 минг евро компенсация тўлайди.
Николич билан бирга унинг ёрдамчилари — Радое Смилянич, Александр Рогич ҳамда жисмоний тайёргарлик бўйича мутахассис Горан Басарич ҳам жамоани тарк этади. Бу эса ЦСКАда бутун мураббийлар штаби янгиланиши кераклигини англатади.
Ўзбекистон терма жамоаси юлдузи Аббосбек Файзуллаев эса Николич даврида клубда ўзига ноодатий ролда ҳаракат қилганди. Илгарилари қанотда фаол ўйин намоён этган футболчи марказга ўтказилди ва ундан кўпроқ ҳимоявий функциялар ҳамда мослашувчан ўйин талаб қилинди. Бу унинг самарадорлигига салбий таъсир кўрсатди ва мухлислар орасидаги мавқеини пасайтирди.
Шунга қарамасдан, Николич унинг салоҳиятига ишонч билдирганди:
— Агар у ҳужумни якунлашдаги камчиликларини бартараф этса, бир мавсумда 10 гол ва 10 ассистга етиши мумкин, — деган эди мураббий.Файзуллаевнинг ўзи ҳам вазиятни тан олган:
— Шахсий натижаларим унчалик яхши бўлмади… Янги позицияга мослашишга тўғри келди. Мен ҳали ҳам ўз устида ишлаяпман ва рақобатдан қўрқмайман, — деган эди у.
Энди эса 21 ёшли ярим ҳимоячи учун янги имкониятлар очилади. Янги мураббий келиши билан ЦСКА аввалги схемага қайтиши мумкин, бу эса Файзуллаевнинг ўзини эркин ҳис қилган позициясига қайтишига олиб келади. Клуб ҳам, мухлислар ҳам ундан яна илгаригидек ёрқин ўйин кутмоқда.