Аббос Эргашев: «Ёзда асосан футболчиларнинг жисмоний ҳолатини яхшилашга эътибор қаратганмиз»
«Гулистон» футбол клуби иккинчи даврага тайёргарликни давом эттирмоқда. Машғулотлар кунига икки маҳалдан давом эттирилмоқда. Йиғин доирасида назорат ўйинлари ўтказилмоқда. Шунингдек, селекция ишлари ҳам жадаллик билан давом этмоқда ва бир нечта ўйинчилар кўрикдан ўтказилмоқда. Ушбу йиғин борасида жамоа бош мураббийи Аббос Эргашев ўз фикрларини билдирди.
«Иккинчи даврага тайёргарликни биринчи қисмини якунладик. Бу вақт давомида машғулотлар режа асосида ташкил этилди. Давралар оралиғи узун бўлганлиги учун 1-қисмда асосан селекция ва жисмоний тайёргарлик бўйича ўйланган вазифаларни амалга оширдик.
Тайёргарлик жараёнида назорат учрашувларини ўтказдик. Ўтказилган назорат учрашувларида албатта бир қатор янги ва ёш футболчиларни синовдан ўтказдик. Қувонарли тарафи рақибларимиз олдида аниқ мақсад ва вазифалар кўйилган жамоалар эканлиги жамоамизга юқори баҳо беришаётганидан далолат. Биз асосан натижага эмас, берилган жисмоний юкламаларни ўйинлар орқали футболчиларга етказиш ва керакли позицияларни тўлдириш бўйича иш олиб бордик. Чунки бизда Кубок ва узоқ давом этадиган чемпионат баҳслари кутиб турибди. Шуни ҳам таъкидлашим керакки, биз натижа учун эмас футболчиларимизни оптимал ҳолатда кубок ва чемпионат ўйинларига тайёрлаш асосий мақсадимиз эди.
Селекция бўйича жамоамизда катта ўзгаришлар қилинмади ва аксинча керакли позицияларга рақобат киладиган футболчиларни танлаб олдик. Ўйлайманки, бу футболчилар жамоамиз натижаларига ҳисса қўшишади.
2-даврада ҳам мақсадларимиз катта. Бизни бир қатор муҳим ўйинлар кутиб турибди. Жумладан Ўзбекистон кубогида ҳам жиддий рақиб билан тўқнаш келамиз. Худо хоҳласа 1-лига баҳсларида финал қисмлари бўлиб ўтади. Бу баҳсларда албатта ғалаба қозониш ва мухлисларимизни хурсанд килиш учун меҳнат қилишда давом этамиз», — деди Эргашев клуб матбуот хизматига берган интервьюсида.
