Аббос Эргашев: «Ўйлайманки, сифатли футбол намойиш этдик»
Биринчи лига 4-туридан ўрин олган «Гулистон» - «Республика ФЖ» (4:1) баҳсидан сўнг мезбонлар бош мураббийи Аббос Эргашев ўз фикрларини билдирди.
«Ўтган турда Тошкентда «Локомотив-БФК»га қарши ўйнадик ва 2:0 ҳисобида ғалаба қозондик. Сунъий қопламали майдонда ўйнаганимизга қарамай, яхши ўйин кўрсатдик ва ўзимизга керакли бўлган натижани қайд этдик. «Республика ФЖ»га қарши баҳсга ҳам юқори кайфият ва яхши тайёргарлик кўрдик. Ўзларингиз гувоҳи бўлганингиздек, сифатли футбол намойиш этдик.
Аввал айтганимдек, «Республика ФЖ»га яхши болалар тўпланишган. Улар катта ва кучли селекция ишлари олиб борилади ва Республикадаги энг иқтидорли ёшлар бор. Бу баҳсда ўйлаган барча режаларимизни амалга ошира олдик. Якунда эса натижа ҳам шунга яраша бўлди. Ўйлайманки, стадионга келган мухлисларимиз жамоамизнинг ўйинидан мамнун ҳолда уйларига қайтишди.
Олдинди бизни «Бунёдкор-2»га баҳс кутмоқда. Кейин Ўзбекистон кубогидаги илк юришимиз Фарғонада «Нефтчи»га қарши бўлиб ўтади. Бу беллашувларда ҳам ижобий натижа кўрсатишга ҳаракат қиламиз», — деди Эргашев.
