А Серия. «Наполи» Лукакунинг сўнгги дақиқаларда урган голи эвазига «Верона»ни мағлуб этди
Италия А Сериясининг 27-туридан ўрин олган «Верона» ҳамда «Наполи» жамоалари ўртасидаги учрашув ўз ниҳоясига етди. «Маркантонио Бентегоди» стадионида кечган баҳсда неаполликлар 2:1 ҳисобига ғалаба қозонди.
Учрашувнинг 2-дақиқасидаёқ Расмус Хойлунд меҳмонларни ҳисобда олдинга олиб чиқди. Иккинчи бўлимнинг 64-дақиқасида Жан-Даниэл Акпа Акпро мувозанатни тиклашга муваффақ бўлди. Бироқ учрашувнинг асосий вақтига қўшиб берилган 90+6-дақиқада Ромелу Лукаку «Наполи»га ғалаба келтирувчи гол муаллифига айланди.
Ушбу натижадан сўнг «Верона» 15 очко билан Италия чемпионати турнир жадвалининг сўнгги, яъни 20-поғонасида қолмоқда. «Наполи» эса ўз очколари сонини 53 тага етказиб, жадвалнинг учинчи поғонасини банд этиб турибди.
Навбатдаги тур доирасида «Верона» 8 март куни сафарда «Болонья» билан куч синашади. «Наполи» эса 6 март куни ўз майдонида «Торино» жамоасини қабул қилади.
А Серия. 27-тур
«Верона» — «Наполи» 1:2
Голлар: Акпро (64) — Хойлунд (2), Лукаку (90+6).
