А Серия. «Милан» ўз майдонида «Парма»га ютқазиб қўйди
Италия А Сериясининг 26-тури доирасида ўтган «Милан» ва «Парма» жамоалари ўртасидаги баҳс кутилмаган натижа билан якунланди. «Сан-Сиро»да мезбонлик қилган баҳсда меҳмонлар минимал ҳисобда ғалаба қозонди.
«Россонери» учун ўйин омадсиз бошланди: учрашувнинг 11-дақиқасида яримҳимоячи Рубен Лофтус-Чик рақиб дарвозабони Эдуардо Корви билан тўқнашиб кетиб, жароҳат олди ва майдонни тарк этишга мажбур бўлди. Баҳсдаги ягона гол 80-дақиқада урилди — «Парма» ҳимоячиси Мариано Тройло аниқ зарбаси билан меҳмонларга муҳим ғалабани тақдим этди.
Ушбу мағлубиятдан сўнг «Милан» 54 очко билан турнир жадвалида 2-ўринда қолмоқда, бироқ пешқадам «Интер» билан орадаги фарқ 10 очкога етди. «Парма» эса очколарини 32 тага етказиб, 12-поғонага кўтарилиб олди.
Маълумот учун, «Милан» ўзининг навбатдаги ўйинини 1 март куни сафарда «Кремонезе»га қарши ўтказади. «Парма» эса ундан икки кун аввал ўз майдонида «Кальяри»ни қабул қилади.
А Серия. 26-тур
«Милан» — «Парма» 0:1
Гол: Тройло (80).
